I dërguari i ShBA-së për Ballkanin Perëndimor, Gabriel Escobar nga Dubrovniku ka folur për situatën e fundit në Kosovë dhe raportet me Serbinë.
Ai ka thënë se beson që zgjidhja më e mirë për dalje nga kriza është pranimi i planit trepikësh të prezantuar nga Bashkimi Evropian, raporton Jutarnjilist.
“Kemi indikatorë pozitivë që presidenti Vuçiq është i gatshëm ta pranojë atë, por që kryeministri Kurti ka nevojë edhe pak që të bindet”, është shprehur Escobar.
I pyetur se cilat do të jenë pasojat nëse Serbia dhe Kosova nuk i plotësojnë kërkesat e bashkësisë ndërkombëtare për të deeskaluar situatën në veri të Kosovës, Escobar tha se të dyja vendet do të humbasin mundësi të shumta.
“Pasojat nuk janë masa ndëshkuese, por janë mundësi të humbura që do të humbasin të dyja vendet nëse refuzojnë propozimin për dalje nga kriza”, tha Escobar, duke shpjeguar se për Kosovën kjo do të thotë largim nga partnerët ndërkombëtarë në rajon, dhe largimi i Serbisë nga hyrja në BE.
Tutje, Escobar the se partneriteti i ShBA-së është në partneritet me popullin e Kosovës, jo me një parti apo figurë politike.
“Partneriteti ynë me Kosovën është partneritet me popullin e Kosovës, jo me një parti apo figurë politike. Përkushtimi ynë ndaj KFOR-it dhe investimi në të ardhmen e Kosovës mbetet i fortë”, përfundoi Escobar./teve1.info/
