Bayer Leverkusen ka shkarkuar trajnerin Erik ten Hag pas vetëm dy javëve të para të Bundesligës. Holandezi reagoi menjëherë me një komunikatë, ku u shpreh i habitur dhe i zhgënjyer nga vendimi i klubit.
“Vendimi i drejtuesve për të më larguar pas vetëm dy ndeshjeve ishte një surprizë e madhe. Të ndahesh me një trajner kaq shpejt është diçka absolutisht e paprecedentë”, tha Ten Hag.
Ai theksoi se Leverkusen këtë verë humbi shumë lojtarë të rëndësishëm dhe se ndërtimi i një skuadre të re kërkon kohë dhe besim:
“Një trajner i ri ka nevojë për hapësirën e tij për të implementuar vizionin, për të ngritur standardet dhe për të lënë gjurmën e vet në stilin e lojës. Për fat të keq, nuk më është dhënë kjo kohë dhe kjo më bën të ndjej se nuk ka pasur kurrë besim reciprok”.
Në fund, Ten Hag falënderoi tifozët për mbështetjen:
“U jam mirënjohës për ngrohtësinë e tyre dhe uroj skuadrën dhe stafin çdo sukses në pjesën e mbetur të sezonit”.
Ky është një rast i rrallë në futbollin europian, që një trajner të shkarkohet pas vetëm dy ndeshjeve të para të kampionatit.
