Shefi i grupit parlamentar i PDK-së, në seancën solemne për përvjetorin e Epopesë së UÇK-së, ka thënë se ngjarjet si ajo e vitit 1998 shënojnë një vlerë të posaçme sepse janë pikëndarje e epokave.
Gjithashtu, Tahiri ka përmendur Hashim Thaçin, Kadri Veselin, Rexhep Selimin e Jakup Krasniqin, për të cilët tha se sot janë në betejën për mbrojtjen e luftës së drejtë të UÇK-së
Sipas Tahirit, ata po e mbrojnë sakrificën e Jasharit dhe gjithë dëshmorëve e martirëve të rënë në luftën tonë.
“Sot e kujtojmë një nga ngjarjet më të rëndësishme të historisë së vendit, 26 vjetorin e Epopesë së UÇK-së. Ngjarjet si ajo e marsit 1998, kanë vlerë të posaçme sepse janë pikëndarje e epokave.Kur e kujtojmë Epopenë e Adem Jasharit, nuk mund të harrojmë edhe bashkëluftëtarët e tij që sot janë në Hagë duke bërë betejën e radhës për Kosovën. Presidentin Hashim Thaçi, Kadri Veselin, Jakup Krasniqi dhe Rexhep Selimin dhe të tjerët, që sot janë në betejën për mbrojtjen e luftës së drejtë të UÇK-së. Ata sot po e mbrojnë drejtësinë e UÇK-së të komandantit Adem Jashari, po e mbrojnë sakrificën e Jasharit dhe gjithë dëshmorëve e martirëve të rënë në luftën tonë”, u shpreh ai.
Tutje, Tahiri u shpreh se Thaçi, Veseli, Krasniqi e Selimi do ta kalojnë këtë sfidë si fitimtarë, sepse lufta e tyre ishte e drejtë.
“Në vitin 1990, Thaçi dhe Selimi u dënuan me grupin e Jasharit nga gjykata serbe, por lufta e tyre ishte e drejtë dhe kemi shpresën që edhe procesin në të cilin po kalojnë sot, do të dalin të drejtë dhe fitimtarë si çdo herë. UÇK ishte e drejtë, Epopeja ishte e shenjtë dhe ajo duhet të përkujtohet me nderim për aq kohë sa do të jetojë populli i Kosovës”, shtoi Tahiri.
