Nënkryetarët e Lidhjes Demokratike të Kosovës, Hykmete Bajrami dhe Lutfi Haziri, bashkë me deputetin Besian Mustafa dhe anëtarët e Kryesisë Alush Gashi e Muhamet Hamiti, kanë pritur në takim emisarin e Posaçëm të Bashkimit Evropian për Kosovën, Peter Sørensen.
Sipas njoftimit të LDK-së, gjatë takimit është diskutuar rreth ngërçit politik të krijuar në vend “nga partia e parë”, si dhe për nevojën urgjente për formimin e institucioneve.
Temë diskutimi ishin edhe kërkesat që LDK ka drejtuar në Gjykatën Kushtetuese lidhur me situatën aktuale politike dhe bllokimin e institucioneve.
Gjithashtu, përfaqësuesit e LDK-së kanë theksuar nevojën për heqjen e masave ndëshkuese ndaj Kosovës, duke theksuar se këto masa po dëmtojnë qytetarët dhe procesin e integrimit euroatlantik të vendit.
Në fund të takimit u shpreh besimi se Bashkimi Evropian do të vazhdojë ta mbështesë Kosovën në rrugën e saj drejt integrimit dhe në proceset tjera demokratike.
