Një 35-vjeçar dhe një 34-vjeçar, persona të kërkuar me urdhërarrest ndërkombëtar, janë ekstraduar në Kosovë nga Gjermania dhe Franca.
Të dyshuarit, të identifikuar me inicialet L.V. dhe A.M., ishin arrestuar më herët nga autoritetet gjermane dhe franceze, pasi kërkoheshin nga institucionet kosovare të drejtësisë nën dyshimin se janë të përfshirë në vepra penale të ndara dhe se i ishin shmangur drejtësisë.
“Ekstradimi i tyre është realizuar të martën, në bashkëpunim të ngushtë me autoritetet e Gjermanisë dhe Francës,” thuhet në njoftimin zyrtar të Policisë së Kosovës.
Pas ekstradimit, të dyshuarit u janë dorëzuar njësive përkatëse të Policisë së Kosovës në rajonet e Prishtinës dhe Gjilanit, për vazhdimin e procedurave të mëtejme ligjore.
Rasti do të trajtohet nga organet kompetente të drejtësisë, në përputhje me legjislacionin në fuqi.
