Një ditë më parë, e para e shtetit shpalosi edhe njëherë detaje për përpjekjet e Serbisë për destabilizimin e Kosovës.
Presidentja Osmani konfirmoi se në fund të muajit maj, ka pasur informacione për veprime specifike të Serbisë, në kufirin me Kosovën.
Rrezik për tensionim të situatës sheh edhe drejtori i Qendrës Kosovare për Studime të Sigurisë, Mentor Vrajolli.
Sipas tij, këtë mund ta bëjë grupi i Milan Radoiçiq.
“Ajo çfarë është shqetësuese është për faktin se janë 100 deri në 300 terrorist siç i kanë quajt institucionet e Kosovës të cilët kanë qenë pjesë e grupit të Banjskës, e që janë të lirë të organizohen vet-organizohen ri-organizohen e cfarëdo tjetër në territorin e Serbisë, pa u penguar nga askush e siç është parë edhe nga rasti i Banjskës, mbase edhe duke u mbështetur nga ana e institucioneve serbe atje” , ka thënë Vrajolli.
Sipas tij, institucionet janë në gjendje gatishmërie.
“Mendoj se institucionet tona duke kryer punën mirë në atë këndvështrimin që në vazhdimësi kanë gjetur armë ilegale, kanë konfiskuar armë ilegale, kanë bërë përpjekje për të vënë rend dhe sigurinë në pjesën veriore me krijua prezencë më të madhe në pjesën veriore. Duke pasur parasysh se atje kërcënimet nga jashtë janë dukshëm më të mëdha se sa në pjesët tjera të Kosovës”, është shprehur Vrajolli.
Detaje rreth një sulmi të mundshëm tha profesori i kriminalistikës, Fatmir Çollaku.
“Tentimi përmes një skenari, njëri nga skenarët e mundshëm ka qenë një operacion u furishëm i planifikuar shumë mirë, me struktura të përziera edhe policore edhe ushtarake edhe xhandarmëria bashkë me diversant, ka qenë një formacion i formatit të gjerë jo i formatit të Banjskës por i formatit më të gjerë, ku ka qenë e planifikuar të angazhohet edhe ushtria”, ka thënë Çollaku.
Krejt kjo, sipas Çollakut u parandalua nga Shtetet e Bashkuara të Amerikës.
“Fatmirësisht nuk ka ndodhur kjo, edhe ajo cfarë thatë ju, faleminderit prej teje që ie korrekt, unë e kom parashikuar, paralajmërua që moti, që nuk do të ketë operacion të armatosur ose agresion në Kosovë, për faktin se miqt tanë ndërkombëtar NATO-ja, konkretisht dhe sinqerisht Amerika e ka parandaluar” , ka thënë ai.
Në anën tjetër, tri herë radhazi, presidenti i SHBA-së, Donald Trump e ka ripërsëritur se ka ndaluar një luftë mes Kosovës dhe Serbisë.
