Pas Lindon Emërllahut edhe një reprezentues tjetër i Kosovës, pritet të largohet muajin e ardhshëm nga skuadra e Clujit.
Bëhet fjalë për mesfushorin me tipare sulmuesi, Meriton Korenicën, i cili po kërkohet me ngulm nga Apollon Limassoli, ekip që bën gara në Superligën e Qipros.
Madje, mediumet rumune kanë raportuar se Limassoli tashmë ka bërë ofertë zyrtare për mesfushorin 29-vjeçar, i cili ka kontratë me Clujin deri në vitin 2027.
Limassoli ka ofruar 2 milionë euro për transferimin e Korenicës dhe Cluji ka afat deri më 31 dhjetor për të dhënë një përgjigje konkrete.
Palët ka kohë që janë në bisedime dhe gjasat janë të mëdha që edhe Korenica të largohet nga Cluji pas Emërllahut, i cili këto ditë pritet të prezantohet te Polyssia Zhytomyr në Ukrainë.
Korenica është pjesë e Clujit prej vitit 2024 kurse këtë sezon ka shënuar 6 gola dhe ka bërë 7 asistime në 29 paraqitje në të gjitha garat.
