Bebe Rexha ka shënuar një tjetër sukses të madh ndërkombëtar, duke dëshmuar edhe një herë fuqinë e saj në skenën globale të muzikës.
Kënga e saj më e fundit, “New Religion”, në bashkëpunim me Faithless, po dominon top-listat, duke arritur rezultate mbresëlënëse si në Mbretërinë e Bashkuar ashtu edhe në SHBA, madje duke kapur vendin e parë në iTunes.
Por surpriza më e madhe vjen nga një tjetër platformë globale, Shazam.
Artistja ndau me ndjekësit në X (ish-Twitter) një moment krenarie, ku “New Religion” renditet në krye të kërkimeve.
“Shazam nuk gënjen”, shkroi ajo, duke lënë të kuptohet se suksesi i këngës reflekton drejtpërdrejt interesin e publikut në mbarë botën.
Ky rezultat tregon se fansat po e kërkojnë masivisht këngën për ta identifikuar, një sinjal i fortë i viralitetit dhe popullaritetit në rritje.
“New Religion” konsiderohet si një nga projektet më të fuqishme të albumit të saj të ardhshëm, Dirty Blonde, i cili pritet të publikohet në qershor.
