Aktivistët e nismës “Asnjë cent më shumë” protestuan sërish para Zyrës së Rregullatorit për Energji. Këta aktivistë kërkuan nga ZRrE një zotim që nuk do të ndodh shtrenjtimi i energjisë elektrike. E sikurse dje edhe sot rreth institucionit ishin një numër i madh i pjesëtarëve të policisë.
Po e bëjnë edhe bisedën e fundit para se të ia mësyjnë Zyrës së Rregullatorit për Energji.
Por më të mbërritur tek zyrat e këtij institucioni, aktivistët e “ Asnjë cent më shumë” aty po i prisnin forcat policore që ishin të shumtë në numër.
Ndonëse tentuan për të hyrë e për ti kërkuar llogari nga ZRrE për ngritjen e çmimit të energjisë elektrike për 15 % ata hasën në pjesëtarët policorë, të cilëve i parashtruan një pyetje.
“A mundeni me na kallxu me çfarë vendimi nuk na lejoni me hy në institucion publik, po du me nxjerr një dokument? Po du me pyt dikë për shtrenjtim të rrymës, qysh është bërë qajo hesap që shtrenjtohet një herë 15% , një herë 20%, një herë 30%, 120% brenda katër viteve. Prej ministrisë së Ekonomisë, e deri te qeveria e Ministria e Brendshme janë mobiluzar që përmes ZRre-së me ia rujt fitimin KEDS-it më dëmë të interesit të qytetarëve. Sot kanë ardh 30/40 polici pa kurfar sensi ndaj 10 apo 15 qytetarëve që protestojnë”, tha aktivisti Dibran Hoxha.
Hoxha tha që protesta është e drejtë demokratike për të shprehur pakënaqësitë,
Ai madje akuzoi, shtetin se po mbrojnë interesat e KEDS-it për të rënduar jetën e qytetarit.
“Qëllimi jonë nuk është me kry kurfar akte agresioni. Nuk e di këta çfarë kanë menduar, a kanë mendu që po e bëjmë ndonjë akt terrorist. Na jemi tu i shfrytëzua të drejtat tona demokratike për me dal e me protestuar, krejt mjetet demokratike që i kemi në dorë. Po shihet se kjo është e pamundur në republikën tonë, kur duan me ia mbrojt interesin KEDS-it edhe i qet 30 polic. E del ai shefi i ZRrE-së thotë gjene rrymën më lirë, edhe ministra Rizvanolli thotë duhet me shtrenjtuar se i kemi do hesape”, tha ai.
Për dallim nga dita e mërkurë që u arrestuan aktivistët që bllokuan zyrat e ZRrE-së, këtë të enjte nuk pati situata të tilla.
Kundër shtrenjtimit të energjisë elektrike është paralajmëruar një protestë me datën 5 prill.
