Ka plotë 14 vite që punon këtu.
Por, punëtorja teknike Valdete Isufi, nuk mbanë mend të ketë pasur vonesa të tilla në ekzekutimin e pagave.
Isufi që është e angazhuar si punëtore në shkollën “Asim Vokshi” në Prishtinë, për më shumë se një dekadë shprehet tejet e shqetësuar me situatën në të cilën po përballet ajo dhe kolegët e saj.
“Edhe vullnetin e punës po ta humbin se nuk e kemi rrogën ne 1000 euro , por 400 euro me ndalesa 370 euro i marrim e edhe për këto me na nxjerr telashe veç në Kosovë ekziston kjo se tjetër ku nuk di që ka ne Evropë dikush telashe ma pagë të vet”, ka thënë Isufi.
E me një situatë të tillë, po përballen edhe punëtorët teknikë të shkollës “ Mehmet Gjevori” në kryeqytet.
Ata thonë se në rast të mos ekzekutimit të rrogës, që nga e marta do të hyjnë në grevë.
“Nga nesër do të hyjmë në grevë. Kërkesa ime është me i vendos rrogat, kompania po thotë që i ka fajet Komuna e këta po thonë kompania kështu që vetëm po e gjuajnë topin herë te Komuna e herë te kompania. E ne punëtorët e shkret po heqim edhe jemi tu hekë, merre me mend me u zgjuar në mëngjes e mos me pas për shembull pare për mos me ardh në shkollë e duhet me marrë bukën me vetë se nuk ki pare me ble, a ka ma keq, më keq nuk e di ku shkon”, është shprehur Haziri.
Kurse edhe Jusuf Azemi nga Sindikata e Pavarur e Sektorit Privat, shprehet se do të mbështes grevën.
Megjithëse, sipas Azemit kompanitë private që operojnë në Prishtina ka ca muaj që janë përballur me problem të tilla.
“Si sindikatë nuk japim vetës të drejtën që gjatë kohës së zgjedhjeve të bëjmë protesta dhe greva. Megjithatë, ne jemi në një gjendje të pafavorshme dhe ne i kemi lënë të lirë që secila kompani të veprojë konform dëshirës së vet që ne normal që do i mbështesim. Ne ju garantojmë punëtorëve që të gjitha pagat në vazhdimësi do t’i kenë”, ka thënë Azemi.
Për këtë çështje nga Komuna e Prishtinës kanë akuzuar Ministrinë e Financave.
“Të gjitha faturat në pritje do të paguhen në momentin që lirohen mjetet nga Ministria e Financave”, kanë thënë nga drejtoria e financave në Prishtinë.
Ndërsa televizioni ka dërguar pyetje në Ministrinë e Financave dhe kompaninë përkatëse, mirëpo nga asnjëra nuk ka pranuar përgjigje.
Pa paga për muajin tetor janë edhe disa shkolla të tjera në Prishtinë që operon firma private në to, duke përfshirë shfmu “ Dardania”, “ Pjetër Bugdani”, “ Ismail Qemaili”, “ Gjergj Fishta”, “ Shkolla e Gjelbër” “ Model” ,QMF-të dhe QKMF-ja.
