Eksperti i sigurisë në Tiranë, Arjan Dyrmishi ka thënë se duke pasur parasysh se vetë Rusia është e interesuar që të ketë destabilizim tjetër në Evropë, situata në Kosovë mbetet e paparashikueshme.
Ai në emisionin “Ditari” në Tëvë 1 tha se kjo situatë kërkon vëmendje të veçantë.
“Siç e theksova marrëdhëniet në mes të Serbisë dhe Kosovës dhe ajo në Bosnjë janë ato që janë duke e mbajtur rajonin në pozita disa të ngadalta mos për të thënë të ngrira në një periudhë të caktuar…Nuk bëhej fjalë për disa persona të cilët në mënyrë spontane ishin organizuar, bëhet fjalë për formacione të cilat dukshëm kishin mbështetje më të gjerë të segmenteve politike-shtetërore. Deklarimi nga ana e shtetit të Serbisë për të mbajtur zi për tre nga sulmuesit e vrarë sigurisht tregon një lloje uniteti të qëndrimit të Serbisë në lidhje me aksione të tilla…Duke pasur parasysh situatën në Ukrainë, duke pasur parasysh se vetë Rusia është e interesuar që të këtë një front tjetër, destabilizim tjetër në Evropë, sigurisht që situata ngelet e paparashikuar dhe kërkon vëmendje të veçantë”.
Sa i përket shtimit të forcave të KFOR-it ai tha se vlerësimin më të mirë e bëjnë ata.
“Prezenca fizike ushtarake, qoftë nga pikëpamja numerike e personelit, qoftë nga rregullat e angazhimit se çfarë lloje armatimesh janë dislokuar aty, se çfarë lloje operacionesh dhe në çfarë formë KFOR-I angazhohet dhe përfshihet për ruajtjen e sigurisë së Kosovës vendoset nga NATO-ja dhe pastaj nga komanda specifike e KFOR-it aty. Mendojë që vlerësimin më të mirë e bëjnë ata në lidhje me shtimin e numrit të trupave”, tha ai.
