Kampionia e Kosovës, FC Drita, ka siguruar kalimin në “play-off”-in e UEFA Conference League, pas fitores së thellë 5:0 ndaj skuadrës nga San Marino, Tre Fiori, në stadiumin “Fadil Vokrri”.
Pas fitores 4:1 në ndeshjen e parë, gjilanasit konfirmuan edhe në ndeshjen e kthimit forcën dhe cilësinë e tyre ndaj rivalit, duke triumfuar bindshëm 5:0 dhe duke siguruar vendin në fazën e “play-off”-it të kësaj gare.
Drita zhvilloi një paraqitje të shkëlqyer, duke e mbyllur pjesën e parë me epërsi 3:0, ndërsa në pjesën e dytë shënoi edhe dy herë të tjera për të vulosur fitoren më bindëse në garat evropiane.
Këtë sukses e ka përgëzuar Federata e Futbollit të Kosovës.
“Përgëzime futbollistëve, stafit teknik, drejtuesve të klubit dhe tifozëve “Intelektualët” për këtë sukses të rëndësishëm, që i sjell nder futbollit të Kosovës në arenën evropiane.FC Dritës i urojmë shumë suksese në “play-off” ndaj Inter d’Escaldes dhe një tjetër përfaqësim dinjitoz të futbollit të Kosovës”, thuhet nga FFK.
