Gjërat për skuadrën e Dritës vetëm sa po rëndohen edhe më shumë.
Komisioni Disiplinor dhe i Etikës pranë FFK-së, e ka dënuar Dritën me zhvillimin e katër ndeshjeve si vendas pa shikues dhe një gjobë prej 1500 eurosh.
Ky dënim i është shqiptuar Dritës për lëshim në organizimin e ndeshjes gjysmëfinale të Kupës së Kosovës ndaj Prishtinës, që u zhvillua mesjavën e shkuar në Gjilan.
Në vendim thuhet se pas përfundimit të ndeshjes, tifozët e Dritës manifestuan sjellje të ashpra dhe josportive, të cilat dëmtojnë autoritetin sportiv të futbollit.
Drita e humbi ndeshjen nga Prishtina dhe u eliminua nga Kupa, gjë që reflektoi me sulmin e drejtorit Valon Zymberi ndaj liderit të “Intelektualëve” Taulant Byqmeti.
Zymberi që ishte ndaluar për 48 orë, ka marrë një masë më e lehtë nga organet e drejtësisë. Drita i ka dalë në mbrojtje Zymberit që e ka konfirmuar në postin e drejtorit, derisa ka dënuar dhunën.