Basketbollisti i Kombëtares së Kosovës, Drilon Hajrizi, është rikthyer në stërvitje te Trepça.
Veterani nga Mitrovica, muaj më parë kishte një problem shëndetësor, ku e detyroi të qëndronte jashtë parketit.
Kjo e detyroi Hajrizin të mungonte në ndeshjet e Trepçës në Superkupën e Kosovës, kampionale dhe ato të kualifikimeve në Ligën e Kampionëve.
Mungesa e Hajrizit, nuk i ndikoi fare Trepçës për objektivat e saj, sepse dhe pa të e fitoi Superkupën dhe siguroi fazën e grupeve në FIBA Europe Cup.
Rikthimin e Hajrizit në stërvitje e bëri të ditur vet klubi nga Mitrovica të enjten, ku përmes një postimi në rrjetet sociale postoi video të basketbollistit duke stërvitur individualisht.
33-vjeçari pritet të rikthehet me skuadrën në pjesën pranverore të stinorit, ndërsa “Xehtarët” sot ndeshen me skuadrën e Bashkimit në ndeshjen e mbetur të xhiros së parë.
Trepça momentalisht në dy ndeshjet e para kampionale ka regjistruar po aq fitore.
