Sot (26 maj) në Bruksel zhvillohet Konferenca e 8-të Ndërqeveritare Shqipëri – Bashkimi Evropian një moment i rëndësishëm në procesin e anëtarësimit të Shqipërisë në BE pasi hap zyrtarisht rrugën drejt fazës së mbylljes së negociatave.
Konferenca vjen pas vendimit të Komitetit të Përfaqësuesve të Përhershëm të Shteteve Anëtare të BE COREPER i cili ka konfirmuar përmbushjen e kushteve të ndërmjetme në Grup Kapitullin “Themelorët” dhe ka përcaktuar kushtet për mbylljen e negociatave për Kapitullin 23 “Gjyqësori dhe të Drejtat Themelore” si dhe Kapitullin 24 “Drejtësia Liria dhe Siguria”.
Në krye të delegacionit shqiptar merr pjesë kryeministri Edi Rama i shoqëruar nga ministrat e kabinetit qeveritar.
Tirana zyrtare rithekson angazhimin për vijimin e reformave dhe përmbushjen e kritereve të integrimit evropian me synimin për të avancuar procesin brenda kësaj dekade.
Agjenda e takimit:
Në orën 18:50, kryeministri Edi Rama së bashku me delegacionin shqiptar pritet të mbërrijë në Këshillin e Evropës në Bruksel.
Pak minuta më vonë në orën 18:55, është parashikuar realizimi i fotografisë familjare me përfaqësuesit e vendeve pjesëmarrëse.
Në orën 19:00 do të nisë zyrtarisht Konferenca e 8-të Ndërqeveritare Shqipëri Bashkimi Evropian.
Në përfundim të takimit rreth orës 20:15, kryeministri Rama dhe zyrtarët e Bashkimit Evropian do të dalin në një konferencë të përbashkët për shtyp ku pritet të bëhen publike mesazhet kryesore të këtij raundi negociatash./rtsh.al/
