Më shumë se 8 tonë kokainë, me një vlerë të vlerësuar në tregun e zi prej rreth 500 milionë eurosh, janë sekuestruar në Gjermani.
Lajmi u bë i ditur të mërkurën nga Zyra e Prokurorisë Publike në Aurich dhe Drejtoria e Përgjithshme e Doganave në Këln.
Në fakt, zbulimi i madh që u bë në Portin Jade-Ëeser më 9 shkurt, por është mbajtur sekret deri më tani për arsye taktike.
“Tetë tonë kokainë në një sekuestrim të vetëm – ky është një goditje e madhe ndaj trafikut ndërkombëtar të drogës”, tha ministri gjerman i Financave, Lars Klingbeil, raporton dpa, përcjellë KosovaPress.
Falë bashkëpunimit të mëvonshëm ndërkombëtar, dy persona të dyshuar si drejtues të rrjetit kriminal u arrestuan nga autoritetet spanjolle në mesin e muajit maj gjatë një dorëzimi të inskenuar të kontejnerëve në provincën Almería të Spanjës. Njëri prej të akuzuarve është drejtor i një kompanie importi.
Sipas doganave dhe prokurorisë, droga u gjet në një kontejner transporti nga Afrika Perëndimore, i cili sipas dokumenteve të ngarkesës ishte i mbushur me kokrra kakaoje dhe kishte si destinacion Spanjën.
Gjatë një kontrolli me rreze X (rentgen) , njësia e inspektimit në Zyrën Kryesore të Doganave në Oldenburg vuri re parregullsi, pas së cilës zyrtarët zbuluan mbi 400 pako të mbështjella me folie të zezë.
Secila pako përmbante rreth 20 blloqe të ngjeshura kokaine.
Autorët kishin pajisur pakot me pajisje GPS për të monitoruar vazhdimisht vendndodhjen e ngarkesës.
Për të parandaluar çdo përpjekje të dhunshme nga kriminelët për të rimarrë drogën, lënda narkotike u asgjësua në Gjermani nën masa të rrepta sigurie.
