Objekti i gjimnazit të vjetër në Komunën e Ferizaj apo shkolla e parë e këtij qyteti u përfshi nga zjarri mëngjesin e së martës, objekt ky i cili është në ruajtje nga Ministria e Kulturës.
Për të parë dëmet nga afër, në vendngjarje doli edhe ministri i këtij dikasteri, Hajrullah Çeku.
Ai kërkoi që autorët e këtij dëmi të vihen para drejtësisë, teksa tregoi se punimet për restaurimin e kësaj shkolle, kishin nisur një ditë më parë.
Po ashtu, Çeku bëri thirrje që të mos fajësohet asnjë institucion derisa organet e rendit të japin vlerësimin e tyre.
E nga Komuna thonë se për sigurinë e këtij objekti është përgjegjës Ministria, konkretisht kompania e kontraktuar për këto punime.
Edhe organet e sigurisë u shprehën se po e bëjnë maksimumin për gjetjen e fajtorit për këtë vepër.
Ndryshe, kjo është hera e gjashtë që ky objekt përfshihet nga flakët dhe deri më tani, akoma nuk ka asnjë të akuzuar për këtë rast.
Kronika e gazetarit Lindrit Zejnullahu.
