Gjurmët e zjarrit janë ende ne muret e Muzeut të Muzikës në Gjakovë.
Ky monument që njihet si Tabhane, u përfshi nga flakët gushtin e vitit 2023.
Hetimet për këtë rast po vazhdojnë nga autoritetet.
“Ju njoftojmë se në rastin konkret janë duke u ndërmarr veprime hetimore, ku nga ana e prokurorit të shtetit janë autorizuar hetuesit policor që të intervistojnë zyrtarët komunal në lidhje me veprimet e tyre në mbrojtje të muzeut .Është bërë dëgjimi i tre (3) të miturve që janë kryers të veprës penale, por të njejtit janë nën moshën 14 vjeçare dhe nuk kanë përgjegjësi penale”, ka thënë Prokuroria Themelore në Gjakovë.
E shpresën që të kthehet përsëri në funksion muzeu i muzikës, e ka drejtori i Muzeut të Qytetit në Gjakovë, Besmir Hasi.
Ndërsa në lidhje me këtë çështje, Ministria e Kulturës ka thënë që puna për rikthimin në funksion të këtij muzeu po vazhdon.
“Në monumentin e Taphanës, Muzeun e Muzikës në Gjakovë kanë filluar punimet menjëherë pasi ky monument ishte kapluar nga zjarri. Në fazën e parë të punimeve kanë qenë të parapara masat e sigurisë, si parakusht për vazhdimin e procedurave të tjera. Tashmë së shpejti do të vazhdohet me restaurimin e këtij aseti, për ta kthyer në gjendjen e mëparshme dhe në shërbim të komunitetit”, ka thënë ministria e Kulturës.
Ky muze i Muzikës është i destinuar për të ekspozuar eksponate të muzikës shqipe teksa Ministria e Kulturës ia ka dhënë statusin këtij monumenti “Aset i trashëgimisë kulturore në mbrojtje” në prill të vitit 2023.
Kronike nga gazetarja: Rinesa Osmanaj
