Carlo Ancelotti prej disa vitesh tashmë bashkëpunon në stafin e tij me djalin, Davide. Italiani është mjaft i kënaqur nga puna e djalit të tij, madje së fundmi shprehet se Davide mund të bëhet një trajner i madh pasi ka aftësitë e duhura për këtë profesion. Ancelotti shkon edhe më tek kur shton se një ditë mund të jetë ai ndihmësi i Davides, dhe jo e kundërta.
“Davide është një trajner i ekuilibruar, serioz. Ai filloi si përgatitës atletik në PSG, pastaj me ne te Real Madrid. E di mirë se si është puna e një stafi dhe është rritur shumë. e ushtron këtë punë prej dhjetë vitesh. Ai e bën pjesën më të madhe të punës në stërvitje. Si karakter më ngjason shumë.
A do të pranoja të isha zëvendësi i djalit tim? Unë do ta bëja, nuk do të kisha asnjë problem. Ashtu siç më ndihmon ai sot, mund ta ndihmoj unë nesër. Nëse ma kërkon, do ta bëja”, u shpreh Ancelotti.
