Sot në mbarë botën shënohet dita ndërkombëtare për zero diskriminim, një ditë që synon të rrisë ndërgjegjësimin për t’i dhënë fund çdo forme diskriminimi dhe për të promovuar diversitetin, tolerancën dhe gjithëpërfshirjen në shoqëri.
Kjo ditë, e iniciuar nga UNAIDS, thekson rëndësinë e trajtimit të barabartë për të gjithë, pa dallim race, gjinie, moshe, përkatësie etnike, orientimi seksual, gjendjeje shëndetësore apo statusi social.
Diskriminimi nënkupton trajtimin e personave në situata të ngjashme në mënyrë të ndryshme, ose trajtimin e njëjtë të personave në situata të ndryshme, pa një justifikim objektiv dhe të arsyeshëm.
Që nga fillimet e njerëzimit, diskriminimi – në forma të ndryshme – ka qenë një problem i vazhdueshëm shoqëror.
Ai shfaqet ndaj popujve autoktonë dhe minoriteteve, ndaj fëmijëve dhe grave që shpesh trajtohen si më pak të vlefshme, ndaj personave që jetojnë me HIV/AIDS, personave me aftësi të kufizuara fizike apo psikike, si dhe ndaj individëve me orientime të ndryshme seksuale.
Ekspertët vlerësojnë se diskriminimi manifestohet edhe në gjuhën e përditshme, ku përmes shprehjeve të caktuara, me ose pa vetëdije, krijohen ndarje dhe paragjykime.
Duke qenë se ai paraqitet në forma të shumta, pothuajse çdo individ mund të ketë përjetuar një formë diskriminimi gjatë jetës së tij.
Në këtë ditë bëhet thirrje për rritjen e vetëdijesimit dhe ndërmarrjen e veprimeve konkrete për ndërtimin e një shoqërie më të drejtë dhe gjithëpërfshirëse për të gjithë.
