Ministri i Jashtëm i Mbretërisë së Bashkuar, David Cameron ka arritur në Kosovë, raporton teve1.info.
Ai është pritur nga zëvendëskryeministrja dhe ministrja e Punëve të Jashtme, Donika Gërvalla në aeroportin ndërkombëtarë “Adem Jashari”.
Cameron nesër do të zhvillojë një takim me presidenten, Vjosa Osmani – Sadriu, kryeministrin Albin Kurti dhe Ministren e Punëve të Jashtme dhe Diasporës, Donika Gërvalla.
“Kjo është vizita e parë që Lord David Cameron zhvillon në Ballkan pas zgjedhjes së tij si Ministër i Jashtëm i Mbretërisë së Bashkuar.Republika e Kosovës është destinacioni i tij i vetëm nga shtetet e Evropës Juglindore që kësaj radhe viziton ai”, thuhet në njoftimin e MPJ-së.
Bëhet e ditur se takimi mes Cameron dhe Gërvallës do të nisë nesër nga ora 8:30 në zyret e MPJD-së, e pas këtij takimi do të ketë konferencë për medie.
“Kryediplomati David Cameron është pritur në Aeroportin Ndërkombëtar të Prishtinës “Adem Jashari”, nga zv. Kryeministrja dhe Ministrja e Punëve të Jashtme dhe Diasporës, Donika Gërvalla, me të cilën do të zhvillojë takim ditën e nesërme duke filluar nga ora 08:30 në zyrat e MPJD-së. Pas takimit dypalësh, zv. Kryeministrja dhe Ministrja e Punëve të Jashtme dhe Diasporës, Donika Gërvalla dhe Ministri i Jashtëm i Mbretërisë së Bashkuar, David Cameron do t’iu adresohen medieve. David Cameron ka qenë Kryeministër i Mbretërisë së Bashkuar gjatë viteve 2010-2016 dhe aktualisht ushtron detyrën e Ministrit të Jashtëm”, thuhet tutje./teve1.info./