I gjakosur përfundoi të enjten zëvendësministri i Financave Hysni Mehani.
Madje, iu desh edhe të hospitalizohet, si shkak i plagëve që pësoi nga rrahja.
Ky qe pre e një sulmi që dyshohet se e shkaktoi kryetari i Skenderajt, Sami Lushtaku.
Të paktën kështu pretendon ish-deputetja Arjeta Fejza, që në momentin e sulmit qe bashkë me Mehanin në kafene, në qendër të Skenderajt.
“Pa asnjë lloj komunikimi paraprak me z.Lushtaku ai u afrua edhe e sulmoi Zv/ministrin Mehani fillimisht me telefon pastaj me dorë e pastaj edhe me gotë siç keni pas mundësinë me e pa dëmin në fytyrën tij, kur sekretari i qendrës sonë tentoi me i nda, ai u sulmua edhe nga disa persona të tjerë”, ka thënë Fejza.
Por tjetër version pati i pari i komunës, Sami Lushtaku, që tha se u provokua.
Madje mohoi të ketë bërë ai sulmin.
“Pushteti i Albin Kurtit përmes mekanizmave të tij tentoi që sot të më sulmoi në Skenderaj. E kam një jetë në shërbim të vendit kurse etiketat si “Sami Serbia” qytetarët nuk i tolerojnë më prandaj edhe reaguan”, ishte reagimi i Lushtakut.
Por emri i tij, thonë as që është përmendur e lërë më etiketa ta tilla.
“Në kemi qenë duke biseduar për një çështje që s’ka lidhje fare as me Skenderajt, e as fare nuk është përmend emri i tij”, thotë ish-deputetja e LVV-së Arjeta Fejza.
Me rastin tashmë po merret edhe prokuroria.
