Detaje nga aksioni i Prokurorisë dhe Policisë për manipulim të votave në Malishevë
Aksionin e nisën në orët e para të mëngjesit në Malishevë.
E urdhri, erdhi nga Prokuroria Themelore e Gjakovës.
Këta të fundit, në bashkëpunim me Policinë e Kosovës, të mërkurën cak kishin personat që dyshohet se manipuluan me vota në Malishevë.
Nën prangat e policisë, përfunduan plot 58 persona.
15 prej tyre, ishin kryesues dhe 43 komisionerë.
Të gjithë këta u transportuan për intervistim këtu në Stacionin Policor në Gjakovë.
Se intervistimi kishte të bënte me dyshimet për manipulime me votat e 28 dhjetorit, e bën të ditur avokatët mbrojtës.
“Klienti është në cilësinë e anëtarit të komisionit, do të thotë deklarata e tij ka të bëjë me funksionin që ka pasur gjatë procesit të numërimit të rezultateve, mirëpo megjithatë informata më të hollësishme në këtë fazë të hetimit nuk mund t’i ofrojmë”, tha avokati Egzon Doli.
E në orën 15:00, para gazetarëve doli vet kryeprokurori i Prokurorisë Themelore në Gjakovë, Enis Gashi.
Ky i fundit bëri të ditur numrin e komisionerëve të cilët u ndaluan për 48 orë.
“Prokuroria Themelorë në Gjakovë ka lëshuar autorizim për Policinë e Kosovës respektivisht drejtorinë e nalt në Gjakovë për të marrur veprime konkrete në lidhje me grumbullimin e provave dhe fillimin e procedurës, pasi që kemi vepruar përmes policisë me autorizimin e Prokurorisë, nga 18 kryesues dhe 50 komisionerë janë intervistuar gjithsej 15 kryesues dhe 43 komisionerë, 15 kryesues aktualisht janë të ndaluar për 48 orë dhe brenda afatit ligjor Prokuroria do të vendosë në lidhje me masën e sigurisë, po ashtu për 48 komisionerë të tjerë jemi në vlerësim e sipër në lidhje me ndonjë masë eventuale. Hetimi do të vazhdojë tutje edhe për kryesuesit edhe komisionerët e tjerë të cilët sot për arsye të ndryshme nuk kemi arritur që t’i kemi prezent”, tha Gashi.
Gashi tha se deri tani janë mbi 17 mijë vota të manipuluara.
E Koordinatorja Nacionale për Zgjedhje, prokurorja Laura Pula nga Gjakova, tha se asnjë individ nuk qëndron mbi ligjin.
