Gjyqtari Gëzim Ademi, nuk ka arritur të marrë votat e mjaftueshme të anëtarëve të Këshillit Gjyqësor të Kosovës (KGJK), për t’u zgjedhur gjyqtar mbikëqyrës në Gjykatën Themelore në Prishtinë, dega në Fushë-Kosovë.
Kjo pasi, i njëjti nga dhjetë vota të anëtarëve prezent, ka arritur të marrë vetëm katër prej tyre, ndërsa gjashtë vota kanë qenë kundër zgjedhjes së tij në këtë pozitë, raporton “Betimi për Drejtësi”.
Votimi për zgjedhjen e gjyqtarit mbikëqyrës në degën e Fushë-Kosovës, është bërë në takimin e 310-të të KGJK-së, këtë të hënë.
Ky konkurs, ishte shpallur më 23 shkurt 2023, pasi sipas KGJK-së, objekti i Gjykatës në Fushë-Kosovë është në përfundim e sipër.
Lidhur me këtë konkurs, Këshilli kishte themeluar edhe Komisionin Vlerësues për gjyqtar mbikëqyrës në Gjykatën Themelore në Prishtinë, dega në Fushë-Kosovë, i përbërë nga kryetarja e Gjykatës Themelore në Prishtinë, Albina Shabani Rama, anëtari i KGJK-së Avni Mehmeti, anëtari i KGJK-së Ahmet Imami dhe anëtar rezervë i komisionit, Fidan Hoxha.
Sipas anëtarit Fidan Hoxha, gjyqtari Ademi ka qenë kandidati i vetëm që ka kandiduar për këtë pozitë dhe i njëjti është rekomanduar nga Komisioni Vlerësues.
Ndryshe, KGJK ka miratuar edhe listën për transferim të lëndëve nga Gjykata Themelore Prishtinë në degën e Fushë-Kosovës, e që janë mbi 1 mijë lëndë që pritet të transferohen në këtë degë të gjykatës./Betimi për Drejtësi/
