Para orës 14:00 erdhën në Kuvend.
Deputetët e partive politike u mblodhën këtë të mërkurë në seancën e jashtëzakonshme për zgjedhjen e Qeverisë.
Qysh në hyrje, ata paraqitën qëndrimet e tyre, nga të cilat nuk lëvizën.
“Kjo çfarë ka ndodh sot, nuk është dashur t’i ndodhë demokracisë dhe shtetit të Kosovës. Kjo është një tallje, mënyra se qysh tentohet të përmbyset krejt ajo traditë e mirë e ndërtuar në Kosovë”, ka thënë Limaj.
Edhe pse nuk arritën ndonjë marrëveshje koalicioni që do t’ua siguronte votat, Albulena Haxhiu, qysh para fillimit të seancës bëri thirrje për votim të Qeverisë Konjufca.
“Nuk kemi pse të shkojmë në dy palë zgjedhje për një kohë të shkurtër dhe të shkojmë në zgjedhje nëse nuk dakordohemi për emrin e presidentit apo presidentes së ardhshme. Dhe sot, për hir të Kosovës, për hir të qytetarëve, le ta votojmë mandatarin, personin e dytë më të votuar, z. Glauk Konjufca, për të cilin kanë thënë se është figurë unifikuese. Pra, le t’i thërrasin mendjes, të reflektojnë”, është shprehur Haxhiu.
Dështimi i Konjufcës, nga ish-blloku opozitar u cilësua si një vazhdimësi e bllokadës.
Ndërsa nga Lëvizja Vetëvendosje, akuzuan partitë e tjera për mosvotimin e buxhetit dhe Qeverisë.
Pas zhvillimeve të sotme, Presidentja pritet t’i shpallë zjgedhjet e jashtëzakonshme parlamentare, pas një dakordimi të datës së mbajtjes së tyre me partitë politike.
