Trajneri i Francës, Didier Deschamps edhe ndaj Spanjës në gjysmëfinale të “Euro 2024” do të luaj me sistemin e lojës 4-3-3 por do t’i bëjë disa ndryshime në formacion, sidomos në mesfushë dhe sulm.
“L’Equipe” ka njoftuar se Deschamps tashmë ka vendosur për ndryshimet pasi beson se me këtë formacion mund ta mposht Spanjën dhe të kualifikohet në finale të Kampionatit Evropian.
Ndryshimi më i madh i Deschampsit do të jetë në fazën e sulmit, ku Antoine Griezmann do të ulet në stol për shkak se nuk ka bindur me paraqitjet e tij.
Në katër prej pesë ndeshjeve të Francës, Griezmann ishte titullar por nuk ka shënuar në asnjërën. Kështu që, Franca ndaj Spanjës në sulm do të luaj me treshen Ousmane Dembele – Randal Kolo Muaji dhe Kylian Mbappe.
Ndryshimi tjetër i Deschampsit në gjysmëfinale do të jetë në mesfushë. Adrien Rabiot që mungoj në çerekfinale shkaku i suspendimit do të kthehet në përbërje në vend të Eduardo Camavingas për të luajtur në mesfushë përkrah N’Golo Kantes e Aurelien Tchouamenit.
Ndeshja mes Spanjës dhe Francës luhet të martën prej orës 21:00 në stadiumin “Allianz Arena” në Munchen.
