Në mesjavë do të zhvillohet xhiroja e 33-të në Superligën e Kosovës. Kryendeshja e kësaj xhiroje padyshim që pritet të jetë në mes Gjilanit dhe Dritës.
Ndryshe nga vitet e fundit, derbi me numër 40 kampional do të zhvillohet pa praninë e tifozëve. Hera e fundit kur derbi më i madh kosovar u luajt pa prezencën e publikut, ishte data 5 maj 2021.
Një vitë me parë, dyert ishin të mbyllura për Skifterët dhe Intelektualë, për shkaqe të infektimit me Covid-19, ndërsa saktësisht pas 364 ditësh, klubi i Gjilanit ka njoftuar se ndeshja derbi e javës së 33-të në edicionin 2021/22 do të zhvillohet pa praninë e publikut. Si pasojë e kësaj është dënimi i marrë i kuqebardhëve nga komisioni disiplinor, për incidentin e ndodhur në duelin me Ballkanin.
Në duelin e katërt të Superligës që dy skuadrat luftojnë për “shtafetën” e qytetit, është shtuar një statistikë e padëgjuar me pare, pasi për herë të pare në histori brenda një sezoni ky ballafaqim mes tyre do të luhet në tri stadium të ndryshme.
Ballafaqimi mes të kuqëve dhe të kaltërve, këtë të mërkurë luhet në stadiumin me bari sintetik në Gjilan.
Derbi i parë në stinorin vjeshtor u zhvillua në stadiumin “Fadil Vokrri” në Prishtinë, kurse takimi i dytë dhe i tretë i këtyre dy ekipeve u zhvillua në stadiumin e qytetit në Gjilan.
Gjilani nuk e ka humbur asnjë ndeshje në këtë sezon ndaj rivalëve të qytetit, duke shënuar dy fitore dhe barazuar një, ndërkohë fitorja e fundit e bardhekaltërve ishte me 3 mars 2021, në atë kohë Bylbyl Sokoli ishte trajner i kuqebardhëve, i cili shkarkohej 24 orë pas disfatës në derbi.
Dy skuadrat gjilanase këtë vit kanë siguruar pjesëmarrjen në garat ndërkombëtare, dhe momentalisht pozicionohen në pozitën e dytë dhe të tretë tabelare, ndërsa lideri Ballkani është 12-të pikë para vendit të dytë, dhe i duhet vetëm një barazim për tu shpallur zyrtarisht kampion në Superligën e Kosovës.
Gjilani do të jetë për herën e dytë në garat ndërkombëtare, ndërsa Drita për të katërten herë dhe për vitin e tretë radhazi, sukses i cili është rekord për klubin bardhekaltër në krye me Ardian Nuhiun. /Tëvë1/
