Deputeti i Lëvizjes Vetëvendosje, Armend Baloku, ka kërkuar dorëheqjen e kryetarit të Komunës së Pejës, Gazmend Muhaxherit, lidhur me rastin e vrasjes së Arlinda Zekajt.
Në deklarimet jashtë rendit të ditës në seancën e sotme të Kuvendit, Baloku ngriti shqetësime për trajtimin institucional të rastit, duke kërkuar përgjegjësi nga institucionet komunale dhe hetim të plotë nga Prokuroria.
Ai kërkoi që organet e drejtësisë të verifikojnë nëse pas vrasjes së Arlindës ka pasur përpjekje për intimidimin e dëshmitarëve, kërkesa për heshtje apo kanosje ndaj personave që mund të japin dëshmi publike.
“Apo kërcënojnë ende të njëjtat grupe të njerëzve? Prokuroria duhet të verifikojë nëse pas vrasjes ka pasur ende intimidim, kërkesa për heshtje, kërkesa për të mos folur më tej për detaje, porosi që dërgohen në emër të të fortëve apo kanosje në rrethin e Arlindës ose ndaj njerëzve që mund të dëshmojnë publikisht apo të ofrojnë mbrojtje aty ku paraqitet rrezik. Kryetari i Pejës, Gazmend Muhaxheri, e kam vetëm një pyetje: Pse ende heshtni? Qendra për Punë Sociale u përfshi në çështjen e kujdestarisë së djalit. Ju duhet të jepni llogari nëse qendra e regjistroi dhunën që raportoi Arlinda, nëse caktoi një përgjegjës për rastin dhe çfarë përkujdesjeje i ofroi nënës dhe fëmijës. Komuna ka për detyrë t’i ofrojë këto shërbime. Po, ishte dashur dorëheqja e kryetarit Gazmend Muhaxheri”, tha ai.
