Departamenti amerikan i Drejtësisë konfirmoi të hënën se Jeffrey Epstein nuk mbante një “listë klientësh”, duke hedhur poshtë një nga pretendimet më të përhapura lidhur me rastin e financierit të ndjerë, i cili u hetua për trafikim seksual të të miturve.
Në të njëjtën kohë, departamenti deklaroi se nuk do të deklasifikohen më dokumente të lidhura me hetimin, pavarësisht premtimeve të mëhershme nga Prokurorja e Përgjithshme e Floridës, Pam Bondi.
Ajo kishte ngjallur shpresa mes figurave konservatore dhe teoricienëve të konspiracionit se zbulime të reja bombastike do të bëheshin publike.
Bondi, në një intervistë për Fox News më herët këtë vit, pati sugjeruar se një “listë klientësh” ekzistonte dhe se ishte “në tavolinën time për shqyrtim”. Por tashmë, deklarata zyrtare e Departamentit të Drejtësisë përgënjeshtron këtë narrativë.
Departamenti publikoi gjithashtu një video nga brenda burgut në Nju Jork, ku Epstein vdiq në vitin 2019, për të mbështetur përfundimin se ai vrau veten. Megjithatë, në një memorandum të fundit, autoritetet thanë se nuk do të publikohen prova të tjera që ishin mbledhur gjatë hetimit.
Pam Bondi kishte deklaruar në mënyrë të përsëritur se priteshin zbulime të mëdha. “Kjo është një administratë e re dhe gjithçka do të dalë në dritë”, kishte thënë ajo, duke i nxitur përkrahësit e Donald Trump të besonin se materialet do të ekspozonin figura të fuqishme të përfshira në rrjetin e trafikimit seksual të Epstein.
Megjithatë, publikimi i parë i dokumenteve – të quajtura “Dosjet Epstein: Faza 1” dhe “Deklasifikuar” – përmbante kryesisht informacione tashmë të njohura dhe nuk solli asnjë zbulim të ri. Kjo shkaktoi zemërim dhe zhgënjim në radhët e konservatorëve.
Pavarësisht këtyre pretendimeve, pas një shqyrtimi të thelluar të provave, Departamenti i Drejtësisë vendosi se nuk ishte e përshtatshme që të bëheshin zbulime të mëtejshme, ka raportuar Associated Press.
Në memo thuhej se një pjesë e madhe e materialeve ishte vendosur nën vulë gjyqësore për të mbrojtur identitetin e viktimave dhe se shumë nga këto prova nuk do të ishin publikuar as nëse Epstein do të ishte gjykuar.
Ky vendim mbyll përfundimisht një kapitull që për vite me radhë ka ushqyer teori konspirative dhe dyshime për mbulimin e të vërtetës mbi rrjetin e fuqishëm të kontakteve të Epstein.
