Gjykata Themelore në Gjakovë pas mbajtjes së shqyrtimit gjyqësor e ka shpallur fajtor dhe i ka shqiptuar dënim unik me burgim të përjetshëm personit me inicialet G.K., pasi që i njëjti dyshohet se ka kryer dy vepra penale “Vrasje e rëndë” dhe “Mbajtja në pronësi, kontroll ose posedim të paautorizuar të armëve”.
G.K., akuzohet se më datë 11 shkurt të vitit 2020, në fshatin Bërnjak të Komunës së Rahovecit, konkretisht në shtëpinë e tij, me dashje ka privuar nga jeta vëllain e tij B.K., ku më pas e ka djegur trupin e viktimës dhe e ka hedhur në një vend deri tani të paidentifikuar, me qëllim për t’i zhdukur gjurmët e krimit.
Sipas njoftimit nga Gjykata, motivi i vrasjes ka ndodhur për shkak të konflikteve që kishin mes tyre lidhur me pronë.
Gjithashtu, sipas Gjykatës i njëjti ka qenë i dënuar më parë për vrasjen e bashkëshortes nga Gjykata e Lozanës, në Zvicër.
“Kundër këtij aktgjykimi, palët kanë të drejtë ankese në afat prej pesëmbëdhjetë (15) ditëve nga dita e pranimit të aktgjykimit në formë të shkruar”, thuhet në njoftim.
