Trukimi i ndeshjeve vijon të mbetet një plagë e futbollit italian. Së fundmi, gjykata e Napolit ka dënuar me pesë vjet burg Armando Izzon i cili është pjesë e Monzas në Serie A. Mbrojtësi që ka një të kaluar me disa skuadra në elitën italiane si Napoli, Genoa apo Torino, u dënua për shkak se ka trukuar një ndeshje teksa ishte pjesë e Avellinos në Serie B në sezonin e 2013-2014.
Ndeshja për të cilën Izzo është dënuar është ajo ndaj Modenas të cilën skuadra e tij e humbi me shifrat 0-1. Izzo ishte i dyshuar edhe për një tjetër ndeshje, megjithatë për këtë rast ja doli të vërtetonte pafajësinë.
Nga ana tjetër, avokatët e 31-vjeçarit kanë sqaruar se vendimin e Gjykatës së Napolit do ta apelojnë dhe sipas tyre në këtë pikë, vetë Izzo do të marrë përsipër të zbulojë edhe arsyet që e dërguan tek trukimi i ndeshjes, si një formë për të rrëzuar dënimin me pesë vite burg.
