Bashkimi i Prizrenit është ankuar për ndarjen e drejtësisë në ndeshjen ndaj Sigal Prishtinës, të zhvilluar në fundjavë. Prishtina fitoi me një pikë dallim, ndërsa klubi prizrenas vlerësoi se është dëmtuar në shumë situata nga arbitrat, duke përfshirë edhe në aksionin e fundit.
Në fakt Altin Morina depërtoi dhe u pengua kur iu afrua koshit. Por sipas arbitrave nuk kishte ndërhyrje të palejuar ndaj tij dhe kështu fitorja i takoi Prishtinës.
Megjithatë arbitrat e asaj ndeshje nuk e kanë kryer punën mirë dhe kjo e arsyeton ankesën e Bashkimit.
Komisioni i Garave i FBK-së ka dënuar tre arbitrat e ndeshjes Prishtina – Bashkimi.
Ngadhnjim Shabani, Elldin Uglari dhe Besim Vitaku janë dënuar me mosdrejtim të ndeshjeve në dy xhirot e ardhshme. Të tre janë dënuar duke u bazuar nëpikën 56.11 të Propozicioneve të Garave.
Kjo pikë saktëson se “për ndarje jo të mirë të drejtësisë sipas raportit të ndeshjes apo video-xhirimit të ndeshjes”, dënimi është dy ndeshje mosdelegim.
Me dy ndeshje mosdelegim është dënuar edhe Albert Vërbiqi, vëzhgues i ndeshjes. Ai është dënuar për “kryerje të papërgjegjshme të detyrës, moszbatim të udhëzimeve dhe vendimeve të Komesarit të Garave, Komisionit të Garave, Propozicioneve të Garave, rregullave zyrtare të lojës”.
Ndeshjen e xhiros së 19-të të Superligës së Kosovës në basketboll, Prishtina e fitoi me rezultatin 84:83. Ka pasur plot momente të dyshimta gjatë ndeshjes së zhvilluar në Prishtinë. Disa prej tyre Bashkimi i ka prezantuar përmes një video-materiali.
Bashkimi ka thënë se do të kërkojë që kjo treshe e gjyqtarëve mos t’i referojë më ndeshjet në shtëpi apo në udhëtim.
Për ndeshjet e fundjavës, Komisioni i Garave ka ndarë dënime të shumta në të holla për lojtarë, zyrtarë e klube.
