Demokracia Konservatore – Qendra Prishtinë ka njoftuar se në këtë balotazh do ta përkrahë kandidatin e Lëvizjes Vetëvendosje për kryetar të Prishtinës, Hajrulla Çekun.
Në deklaratën e Fadil Kopranit thuhet se ky vendim nuk është marrë për interesa apo marrëveshje politike, por për një arsye të vetme – Prishtina ka nevojë për ndryshim.
“Prej vitesh, qyteti ynë është mbajtur peng nga grupe interesi që e kanë parë Prishtinën si pronë të tyre, duke bllokuar zhvillimin dhe projektet që duhej të ishin për qytetarët. Është koha që kjo të marrë fund,” thuhet në postimin e tij në Facebook.
Demokracia Konservatore thekson se qyteti nuk ka nevojë për ankesa dhe propagandë, por për punë konkrete, vizion dhe drejtim të qartë.
“Ne si konservatorë besojmë në rend, në përgjegjësi dhe në vendimmarrje të ndershme. Prandaj e kemi parë të arsyeshme të qëndrojmë në anën e ndryshimit, pa kushte dhe pa përfitime – vetëm me një synim: që Prishtina të ecë përpara,” thekson Koprani./teve1.info/
