Sipas tij, pronarë direkt të barrikadave në veri janë “Mbrojtja Civile” dhe grupet paramilitare serbe.
“Pronarë direkt të barrikadave në veri nuk janë qytetarët serbë që jetojnë atje, përkundrazi ata janë viktima të barrikadave, sepse po jetojnë në një jetë të mjerueshme atje. Pra, pronarët direkt të barrikadave atje janë Mbrojtja Civile dhe janë grupet paramilitare serbe. Ndërsa, pronar indirekt i barrikadave, është presidenti i Serbisë, Aleksandar Vuçiq”, deklaroi Demhasaj në emisionin “Këndi i Debatit”.
Sa i përket ish-policëve që kanë dhënë dorëheqje nga institucionet e Kosovës, Demhasaj tha se ata nuk pranojnë assesi të bëhen pjesë e barrikadave, pasi sipas tij, frika e tyre qëndron tek grupet paramilitare serbe, duke qenë se mund të vriten atje.
“Në veri ka presion tepër të madh ndaj qytetarëve për të qëndruar në barrikada. Gjatë natës në barrikada nuk ka qytetar. Po ashtu, një pjesë e madhe e ish-policëve që kanë dhënë dorëheqje nga Policia e Kosovës, nuk po pranojnë të bëhen pjesë e barrikadave, e kjo pikërisht nga frika që e kanë nga grupet paramilitare serbe, sepse ata edhe mund të vriten aty, e pastaj t’u mbet faji shqiptarëve, ashtu edhe si e kanë tendencën”, tha tutje Demhasaj/teve1.info/.
