Deputetja e PDK-së, Blerta Deliu-Kodra ka kritikuar Qeverinë e Kosovës për, sipas saj, përshpejtim të qëllimshëm të procedurave parlamentare në miratimin e projektligjeve, të cilat ajo pretendon se po përdoren për qëllime elektorale.
Gjatë fjalës së saj në Kuvend, Deliu theksoi se vendi ndodhet pranë përfundimit të afatit kushtetues për zgjedhjen e presidentit, ndërsa paralelisht, sipas saj, Qeveria Kurti 3 po procedon projektligje me “urgjencë artificiale”.
Ajo u shpreh se kjo qasje po ndodh pa debat të mirëfilltë publik dhe pa respektim të rregullave parlamentare, duke shtuar se komisionet parlamentare janë mbingarkuar qëllimisht me projektligje që, sipas saj, kanë qëndruar për vite të tëra pa u trajtuar.
“Na ndajnë vetëm pak ditë deri në përmbylljen e afatit kushtetues për zgjedhjen e presidentit, ndërkohë që atë që po e shohim në seancat plenare dhe në punimet e Kuvendit është që Qeveria Kurti po bën atë që nuk guxon ta bëjë. Pra, po sjell ligje me urgjencë artificiale pa debat publik, pa konsultim real dhe pa respektim të procedurave parlamentare. Komisionet e Kuvendit janë ngulfatur qëllimshëm me projektligje të cilat kjo Qeveri i ka mbajtur në sirtar për vite me radhë. Tash në kohën kur po diskutohet për zgjedhje të reja Qeveria po tenton t’i kalojë me shpejtësi, jo sepse të njëjtat ligje janë urgjencë për qytetarët, por sepse i duhen për propagandë elektorale”, tha Deliu.
