Delegacioni i Grupit të Miqësisë Francë–Ballkani Perëndimor të Senatit francez, i kryesuar nga senatorja Marta de Cidrac, ka zhvilluar të hënën ditën e parë të vizitës së tij në Kosovë.
Sipas Ambasadës së Francës në Kosovë, gjatë qëndrimit delegacioni zhvilloi takime me Koordinatorin për Integrimin Evropian, Jeton Zulfajn, Shefin e Misionit të EULEX-it, Antero Lopes, kryetarin e Partisë Demokratike të Kosovës (PDK), Bedri Hamzën, kryetarin e Lidhjes Demokratike të Kosovës (LDK), Lumir Abdixhikun, si dhe kryetarin e Aleancës, Ardian Gjinin.
Në kuadër të vizitës, përfaqësuesit francezë u takuan gjithashtu me pjesëtarë të shoqërisë civile dhe oficerë francezë të angazhuar në KFOR.
Gjatë takimeve u diskutua për zhvillimet aktuale në Kosovë, sfidat me të cilat përballet vendi, si dhe perspektivat e tij në procesin e integrimit evropian.
Ambasada e Francës theksoi se Franca mbetet e angazhuar në mbështetje të zhvillimit demokratik, ekonomik dhe social të Kosovës, forcimit të sundimit të ligjit dhe avancimit të perspektivës evropiane të vendit./teve1.info/
