“Kosova nuk mund të bëjë vetëvrasje politike as për miqtë e saj më të ngushtë”. Kjo është një pjesë e deklaratës së ministres së Punëve të Jashtme dhe Diasporës, Donika Gërvalla, nga intervista e dhënë për një medium austriak.
Ajo haptazi akuzoi të dërguarin e posaçëm të Bashkimit Evropian për dialog, Miroslav Lajçak se me qëndrimet e tij të njëjta me presidentin serb, Aleksandar Vuçiq, po e inkurajon përshkallëzimin e situatës në veri.
E këto deklarata të kryediplomates po shihen si të dëmshme nga njohësit e politikës.
“Është vazhdimësi e deklaratave të saj të pamatshme totale të gjuhës diplomatike, dhe për fat të keq edhe mungesë e një kulture elementare të komunikimit zyrtar shtetëror por edhe individual. Po unë besoj që diplomatët veç janë në dijeni me kënd kanë punë dhe tash as ata nuk befasohen ma me këtë lloj komunikimi de ajo çfarë po ndodh është injorimi”, tha Anton Berisha, Ish- zëvendësministër i Punëve të Jashtme.
Madje, Gërvalla edhe kërkoi që Perëndimi të sjellë diplomatë të tjerë në Ballkan. Kjo kërkesë e saj po shihet e pazakontë nga profesori universitar Abit Hoxha.
“Diplomatët që vijnë në Kosovë, nuk varen prej Kosovës edhe pse akreditohen në Kosovë ku u jipen letrat kredenciale, por nuk varen prej Kosovës. Kjo është një far infantiliteti i mosdijes i sistemit politik por dhe i diplomacisë. Të gjitha këto çështje nëse komunikohen, komunikohen në njëfar diskrecioni të plotë mes shteteve dhe superiorëve”, deklaroi Hoxha.
Ndërkaq, reagime karshi Gërvallës, e kritika pati edhe nga figura të tjera politike.
Kronika e gazetares Valëza Sylejmani.
