Emisari i Bashkimit Evropian për dialogun mes Kosovës dhe Serbisë, Miroslav Lajçak, u shpreh i lumtur që kryeministri i Kosovës, Albin Kurti, e ka pranuar në parim propozimin e Bashkimit Evropian.
Qëndrimin e Kurtit e ka mirëpritur edhe Ambasadori Amerikan në Kosovë, Jeffrey Hovenier, i cili tha se kjo marrëveshje do i sjell përfitime të dyja palëve të përfshira në dialog.
Kurse njohësit e çështjeve politike konsiderojnë se pranimi i kësaj marrëveshjeje hap rrugën për themelimin e Asociacionit të Komunave me shumicë serbe.
E kundër idesë për formimin e asociacionit po shprehet politikani social-demokrat, Nenad Çanak.
“Unë personalisht jam kundër çdo organizimi territorial të bazuar në parimin etnik. Këto ide krijojnë ‘Rajone Autonome’ dhe zakonisht përfundojnë në eksode ose gjenocid, siç ka ndodhur në Bosnje dhe Hercegovinë. Komuniteti ndërkombëtar po përpiqet në mënyrë mekanike të krijoj paqe Ballkanin Perëndimor duke tregtuar territore, megjithëse kjo u dëshmua të ishte thellësisht e dëmshme në vitet 1990. Kurti është në një pozitë shumë të vështirë”, tha Çanak.
Ndërsa njohësi i çështjeve politike, Belgzim Kamberi, vlerëson se ka deklarata kundërthënëse nga Qeveria Kurti për çështjen e Asociacionit.
Sipas tij, pranimi i propozimit franko-gjerman nënkupton rrjedhimisht edhe respektimin e marrëveshjes për asociacionin.
Ndërmjetësuesi i këtij procesi, Miroslav Lajçak, ka paralajmëruar që do të mbahet një takim i nivelit të lartë në ditët në vijim mes dy delegacioneve.
Kronika e gazetarit Shpat Blakçori.
