Napoli do të ketë shumë mungesa në ndeshjen e xhiros së dytë të Ligës së Kampionëve kundër Sporting Lisbonës.
Ndeshja Napoli – Sporting luhet të mërkurën nga ora 21:00 dhe një prej mungesave të kampionit italian është kapiteni i Kosovës, Amir Rrahmani.
Trajneri i Napolit, Antonio Conte, ka thënë se Rrahmani është mungesë e madhe për ekipin.
“Rrahmani u lëndua derisa ishte në detyrë me ekipin përfaqësues dhe së bashku me Alessandro Buongiornon janë dy mungesa në qendër të mbrojtjes”, ka thënë Conte të martën në konferencë për media.
Rrahmani u lëndua gjatë ndeshjes që Kosova e humbi 4:0 nga Zvicra në Basel më 5 shtator.
Ai më pas nuk luajti kundër Suedisë më 8 shtator, ndërsa për Napolin nuk është paraqitur në tri ndeshjet e fundit. Ndaj Pisas ishte në bankën e rezervistëve, por u raportua se një ditë para ndeshjes kundër Milanit, pësoi tjetër lëndim në stërvitje.
Ai pritet t’i mungojë Kosovës në dy ndeshjet e tetorit, kundër Sllovenisë dhe Suedisë.
