Ministria e Industrisë, Ndërmarrësisë, Tregtisë dhe Inovacionit ka publikuar çmimet maksimale të lejuara për shitjen e derivateve të naftës në Kosovë për ditën e sotme.
Sipas çmimeve të përcaktuara nga ministria, një litër naftë do të shitet me çmim maksimal prej 1.79 euro, një cent më shtrenjtë krahasuar me ditën e djeshme, kur çmimi ishte 1.78 euro.
Ndërkohë, benzina do të shitet me 1.52 euro për litër, ndërsa gazi me 0.62 euro për litër.
Ndryshe, çmimi më i lartë i naftës në Kosovë që nga fillimi i luftës në Lindjen e Mesme u regjistrua më 9 prill, kur një litër arrinte në 1.91 euro.
Pas armëpushimit mes Shteteve të Bashkuara të Amerikës dhe Iranit, çmimet e naftës në tregjet ndërkombëtare kishin shënuar rënie.
Megjithatë, tensionet e reja dhe rikthimi i sulmeve, së bashku me mbylljen e sërishme të Ngushticës së Hormuzit, kanë ndikuar në rritjen e pasigurisë në tregun global të energjisë.
Ngushtica e Hormuzit është një nga rrugët kryesore për transportin detar të naftës në botë, ndaj çdo ndërprerje e qarkullimit në këtë korridor mund të ndikojë drejtpërdrejt në çmimet ndërkombëtare të energjisë.
