Seanca gjyqësore ndaj Kadri Xhemajlit, i akuzuar për veprën penale “Kanosja” ndaj kryeministrit të Kosovës, Albin Kurti, pritet të nisë në ora 09:00 para gjyqtarit të çështjes, Rrahman Beqiri.
Deri tani, në sallën e gjyqit janë të pranishëm i akuzuari Kadri Xhemajli së bashku me avokatin e tij, si dhe prokurori special Bekim Kodraliu.
Ndërkaq, ende nuk është paraqitur i dëmtuari Albin Kurti, raporton “Betimi për Drejtësi”
Sipas aktakuzës së Prokurorisë Speciale, e ngritur më 13 gusht 2025, Xhemajli më 22 tetor 2025, me dashje dhe me qëllim të frikësimit të personit zyrtar lidhur me punën dhe pozitën e tij si kryeministër i Republikës së Kosovës, dyshohet se publikisht e ka kanosur të dëmtuarin Albin Kurti se do ta privojë nga jeta.
Sipas aktakuzës, kanosja është bërë përmes rrjetit social Facebook, ku Xhemajli dyshohet se ka publikuar një koment me përmbajtje kërcënuese ndaj Kurtit.
Në aktakuzë thuhet se Xhemajli ka komentuar: “Ah Albin e meriton me ja shpue kryt po nejse i vjen reni edhe ati”.
Me këto veprime, Xhemajli akuzohet se ka kryer veprën penale “Kanosja”, nga neni 181, paragrafi 3, lidhur me paragrafin 1 të Kodit Penal të Republikës së Kosovës.
Rasti po shqyrtohet nga Gjykata Themelore në Prishtinë, Departamenti Special.
