Në takimin mes palës kosovare dhe asaj serbe që do mbahet me 18 mars në Ohër të Maqedonisë së Veriut, nënshkrimi i mundshëm i marrëveshjes mbi planin evropian nuk pritet t’ia sjell Kosovës njohjen de jure nga Serbia.
Megjithatë, nga ky takim ka pritshmëri për përfitime tjera që ndërlidhen veçmas me anëtarësimet në organizatat ndërkombëtare dhe në integrimet evropiane.
Njohësi i cështjeve politike, Gazmir Raci, rendit proceset që kjo marrëveshje mund t’u hap rrugë.
“Kosovës i hapet prepsektiva e qartë euroatlantike, rrugëtimi për NATO e po ashtu edhe 5 shtetet mos njohëse, duket se ka sinjale pozitive dy nga ato ta njohin shpejt pavarësinë e Kosovës. Në të njëjtën kohë për herë të parë, Serbia po i njeh pasaportat e Republikës të Kosovës, e po ashtu po i ngrisim nivelin e përfaqësimit diplomatik në të dyja shtetet”, tha Raci.
Ndërkaq, politologu Dirtëro Arifi, tregon se gjasat janë shumë të mëdha që me nënshkrimin e planit franko gjerman, Kosovës i hapen të gjitha rrugët euroatlantike.
Mirëpo sipas tij, ngecje mund të ketë në zbatimin e këtij plani.
“Ka një keqkuptim prej të dyja palëve, prej të trijave në fakt. Sepse nëse në pikën 10 thuhet që duhet zbatuar të gjitha marrëveshjet paraprake, kjo nënkupton që edhe Kosova edhe Serbia duhet tí zbatojnë të gjitha marrëveshjet që i kanë nënshkruar. Dhe po vërehet që BE-ja nuk e ka fuqinë e implementimit të marrëveshjeve ndërkombëtare, e as atyre paraprake. Pra BE-ja po tregon dobësi karshi detyrimit të palëve që ta nënshkruajnë apo zbatojnë”, deklaroi Arifi.
Derisa kryeministri i Kosovës, Albin Kurti është shprehur i gatshëm për ta nënshkruar marrëveshjen e ofruar nga ndërmjetësit evropianë, presidenti i Serbisë, Aleksandër Vuçiq nuk ka dhënë asnjë sinjal se është i vullnetshëm ta bëj të njëjtën gjë.
Kronika e gazetares Valëza Sylejmani.
