Garës për të parin e Komunës së Gjilanit ia mësyn gjashtë kandidatë.
Karrigen e të parit të komunës së Gjilanit e synon, Kandidati nga radhët e Lëvizjes Vetëvendosje, Alban Hyseni, Arbër Ismajli nga Lidhja Demokratike e Kosovës, Riad Rashiti nga Partia Demokratike e Kosovës, Nazim Gagica nga Aleanca për Ardhmërinë e Kosovës, Ilir Poroshtica nga “Guxo” dhe Isa Agushi nga Bashkimi për Ndryshim Anamorava.
Gjithë këta iu drejtuan votuesve me premtime të ndryshme për zhvillimin e qytetit.
Por, përtej fushatave, premtimeve dhe sloganeve, çka konkretisht presin qytetarët nga ai që do të zë postin e të parit të Komunës?
“Mirë këtu disa gjëra kanë shkuar shumë përpara siç është sheshi. Me e bo ndonjë rrugë alternative me e lehtësuar trafikun, në Zvicër rrallë ndodh ndokund me pa kështu përveç në autostrada”, tha qytetari Afrim Gërbavci.
E dikush thotë që nuk ka parë ndonjë ndryshime në komunën që jeton.
“Ndryshim diçka risi nuk ka, ndryshime diçka do të ketë, por në favorin e qytetarit jo, më shumë të interesave partiake. Kjo qendra veç qyteti ndryshim me bo diçka se kjo para 50 viteve kështu është nuk ka ndryshuar asgjë”, tha qytetari Refik Shala.
E gjilanasi Qamil Isufi, pret që fusha e arsimit dhe edukimit të jetë në prioritet i të parit të Komunës.
“Shpresoj të zgjidhen më të mirët uroj të ketë një prosperitet tjetër Kosova në të njëjtën kohë edhe Komuna jonë, është e vetmja dëshirë që ne të jetojmë më mirë të nesërmen. Shumëçka për shkollën, për infrastrukturën për edukimin e të rinjve të rejave”.
Për dallim nga këta të fundit, Shaban Shabani thotë se nuk do të shfrytëzojë të drejtën e tij të votës.
“Hiç nuk dal nuk ka më 200 euro kur po vjen rryma, uji, mbeturina e barna se për 87 vjet jam hi e 100 euro barna po më shkojnë. Në Gjilan me ndryshuar më mirë me i rritë pensionet2.
E nga Organizata Jo Qeveritare “Gruaja Hyjnore” në Gjilan presin punë të mëdha, posaçërisht për gratë.
“Në këto zgjedhje presim më pak premtime më shumë punë, kohët e fundit kemi vërejtur që ka më shumë premtime e më pak punë. Fonde më shumë një jetë më të mirë e të sigurt sidomos për gratë dhe vajzat presim grante më shumë, për OJQ-të, presim të ndahen fonde si për kategoritë me nevoja të veçanta poashtu edhe për gratë”, tha aktivistja Arijeta Maka.
Në zgjedhjet e vitit 2021, në balotazh kishin shkuar kryetari aktual Alban Hyseni nga Lëvizja Vetëvendosje dhe rivali i tij nga Lidhja Demokratike e Kosovës Lutfi Haziri.
Fitues doli, Hyseni nga Vetëvendosje.
