Sekretarja e Përgjithshme e Partisë Demokratike të Kosovës (PDK), Vlora Çitaku, pasi ka bërë homazhe në Kompleksin Memorial në Prekaz, ka uruar që kjo festë të jetë e fundit që shënohet pa ish-krerët e Ushtrisë Çlirimtare të Kosovës (UÇK), të cilët po mbahen në paraburgim në Hagë.
“Sigurisht që sot na mungojnë shumë liderët tanë të luftës, Hashim Thaçi, Kadri Veseli, Jakup Krasniq e Rexhep Selimi. Qoftë ky Nëntori i fundit që e shënojmë pa ta”, tha ajo.
Çitaku shtoi se nga Prekazi fillon gjithçka dhe e përshkroi vendin si burim frymëzimi dhe simbol të sakrificës dhe heroizmit.
“Ngado që të nisemi si komb, nga këtu fillojmë. Nga Prekazi legjendar, Prekazi i sakrificës, nga Prekazi i heroizmit, nga Prekazi që është një kujtim dhe mësim i përhershëm që atdheu dhe liria duhet të duhen pa kushte. Atdheut, liria janë parakusht për krijimin e çdo vlerë tjetër”, ka theksuar Çitaku.
