Nënkryetarja e Partisë Demokratike të Kosovës (PDK), Vlora Çitaku, ka reaguar ndaj deklaratave të kryetarit të Lëvizjes Vetëvendosje dhe mandatarit për kryeministër, Albin Kurti, të bëra gjatë një takimi me mërgatën në Londër.
Sipas saj, Kurti nuk është duke kërkuar marrëveshje për bashkëqeverisje, por “nënshtrim politik” nga subjektet e tjera.
Në reagimin e saj në Facebook, Çitaku ka akuzuar Kurtin se po e keqpërdor aparatin diplomatik të Kosovës për qëllime partiake në një kohë kur vendi ende nuk ka qeveri të re.
“Në kulmin e fushatës zgjedhore, në një kohë kur vendi nuk ka qeveri legjitime, ky është abuzim i skajshëm me institucionet e shtetit. Rasti i fundit në Londër e shfaq më qartë se kurrë mendësinë e një partie që e sheh shtetin si pronë të vetën”, ka shkruar ajo.
Duke iu referuar fjalimit të Kurtit në Londër, ku ky i fundit kishte folur për vështirësitë në arritjen e një marrëveshjeje për qeverisje dhe kishte përmendur “xhelozinë, inatet dhe cinizmin” në skenën politike, Çitaku tha se vetë Kurti është ai që e ka krijuar një atmosferë të tillë.
“Njeriu që nuk la askënd pa fyer e përbuzur, sot del e thotë se është helmuar atmosfera. Jo, A.K., ti nuk kërkon marrëveshje e as kompromis – ti kërkon nënshtrim. Por ky popull nuk është e nuk do të jetë kurrë popull që nënshtrohet”, ka theksuar Çitaku.
Kurti: Nuk është e lehtë të formohet qeveria, atmosfera politike është intoksikuar
