Sekretarja e PDK-së, Vlora Çitaku ka bërë të ditur se pas dorëheqjes së kryetarit Memli Krasniqi, Kryesia e Partisë ka vendosur të thërrasë Konventën e Jashtëzakonshme, e cila, sipas nenit 35 të Statutit të PDK-së, duhet të mbahet brenda pesë ditësh.
Çitaku theksoi për Tëvë1 se gara e brendshme inkurajohet dhe mirëpritet, duke theksuar se çdo anëtar që i plotëson kriteret statutare është i mirëseardhur të kandidojë për postin e kryetarit.
Sipas saj, pavarësisht kush garon, prioriteti kryesor i PDK-së mbetet uniteti dhe përgatitja për zgjedhjet e përgjithshme që pritet të mbahen së shpejti.
“Në mbledhjen e fundit të Kryesisë, pas dorëheqjes së Kryetarit Memli Krasniqi, Kryesia vendosi të thërrasë Konventën e Jashtëzakonshme, e cila, bazuar në nenin 35 të Statutit të Partisë, duhet të mbahet brenda pesë ditësh. Ne e inkurajojmë dhe e mirëpresim garën e brendshme. Çdo anëtar apo anëtare që i plotëson kriteret e përcaktuara me Statut është i mirëseardhur të kandidojë. Gara do ta bënte Konventën edhe më madhështore. Për secilin prej nesh, qofshim në garë ose jo, është thelbësore që në përfundim të këtij procesi të dalim të unifikuar, me vizion të qartë dhe me platformë të fortë për zgjedhjet e përgjithshme që na presin shumë shpejt. Më e rëndësishme se gara e brendshme është fitorja jonë në zgjedhjet parlamentare. Sepse beteja kryesore politike për secilin prej nesh është ajo se kush do të jetë Kryeministri i ardhshëm i Republikës së Kosovës”, deklaroi Çitaku./teve1.info/
