Barcelona nuk ia doli të kualifikohej në Champions League, kjo si pasojë e faktit që nuk arriti të fitonte asnjë nga dy ndeshjet me Interin në fazën e grupeve. Skuadra e Simone Inzaghit mposhti 4-0 Viktoria Plzen në “San Siro”, takim ku u rikthye me gol Romelu Lukaku, dhe siguroi kalimin mes 16 më të mirëve në turneun prestigjioz.
Më vonë erdhi edhe humbja 0-3 e Barcelonës ndaj Bayern Munchen, sfidë që nuk kishte më asnjë rëndësi pas triumfit të ekipit italian. Presidenti Joan Laporta e pranon se ishte torturuese të shihje Interin duke fituar, teksa ndalet edhe te vazhdimësia, me djemtë e Xavit që do tentojnë fitimin e kampionatit spanjoll dhe Europa League.
“Fatkeqësisht mrekullia nuk ndodhi. Duhet të falënderojmë tifozët sepse në një ndeshje shumë të vështirë ata inkurajuan lojtarët dhe ekipin. Kemi tifozët më të mirë në botë. Përballë Bayernit ishte një ndeshje e vështirë në aspektin emocional, sidomos pas përfundimit të duelit të Interit.
E pamë të gjithë bashkë fitoren e tyre ndaj Viktoria Plzen, ishte realisht torturë për ne. Tani duhet të shohim përpara, kemi ende La Ligën dhe kompeticionet e tjera. Ne e dinim që në këtë periudhë ndërtimi ekipi, do të kishte ulje-ngritje. Duhet të vazhdojmë të rritemi çdo ditë“, deklaroi kreu i klubit katalanas.
