Kryeministri i Kosovës, Albin Kurti ka thënë se kreu i PDK-së, Memli Krasniqi dhe ai i LDK-së, Lumir Abdixhiku, po flasin si të ishin aktivistë që kanë dhënë dorëheqje.
Ai në Kuvendin e Kosovës përmendi një deklaratë që kishte dhënë Skender Hyseni në Tëvë 1, për Lumir Abdixhikun.
“Ju jeni PDK e LDK, s’jeni Vetëvendosje. Nuk e di pse po me kujtohet tash deklarata e Skënder Hysenit, i cili patë thënë se deputeti Abdixhiku është Vetëvendosje në LDK”, tha Kurti.
Ish- anëtari i kryesisë së LDK-së, Skender Hyseni kishte thënë se në LDK ka disa persona duke filluar nga Abdixhiku që janë njësi e VV-së në LDK.
“Më vjen keq që LDK-ja ka degraduar në këtë çështje kaq shumë, por unë nuk e gjej po përpiqem ta gjej arsyen këto ditë pse, por e vetmja përgjigje që po jap vetvetes është që në LDK ka një grup që janë më shumë Vetëvendosje sesa LDK…janë të ndikuar, janë njëfarë filali i Vetëvendosjes… ka njëfarë mendësie aty të Vetëvendosjes. Nuk mund ta luftosh Vetëvendosjen me metodat e Vetëvendosjes. Duhet të jesh pak më kreativ”, kishte thënë ai.
