Kandidati për kryetar të Prishtinës nga Lëvizja Vetëvendosje, Hajrulla Çeku, ka premtuar mbështetje për ekonominë digjitale e kreative, si dhe përfshirje të saj në zhvillimin e qytetit.
Çeku ka theksuar se me vizion të qartë dhe bashkëpunim me sektorin inovativ, Prishtina mund të shndërrohet në shembull transformimi përmes dijes dhe teknologjisë.
“Fourbyte është një shembull i qartë i potencialit që ka sektori ynë i teknologjisë. Me përvojë të gjatë në komunikim dhe IT, kjo kompani po zhvillon zgjidhje inovative për menaxhimin inteligjent të ujit, ndriçimit dhe mbrojtjes së ambientit, produkte që kursejnë burime dhe rrisin transparencën e efikasitetin e shërbimeve publike. Këtë qasje do ta ndjekim edhe ne duke ofruar mbështetje për ekonominë digjitale e kreative dhe përfshirje të saj në zhvillimin e qytetit. Teknologjia nuk është vetëm industri, por mjet për ta bërë qytetin më të mençur, më të gjelbër dhe më të drejtë për secilin banor. Me vizion të qartë dhe bashkëpunim me sektorin inovativ, Prishtina mund të shndërrohet në shembull transformimi përmes dijes dhe teknologjisë”, ka shkruar ai në Facebook.
