Ministri i Kulturës, Rinisë dhe Sportit, Hajrullah Çeku ka reaguar pas djegies së objektit të ish-gjimnazit të parë në Ferizaj “Ismail Qemali” i njohur si “Gjimnazi i Vjetër”.
Këtë Çeku e ka quajtur krim, teksa thotë se përgjegjësit duhet të përballen me drejtësinë.
Sipas tij, kontrata për restaurimin e gjimnazit është nënshkruar javën e kaluar.
“Kontratën për restaurimin e gjimnazit të vjetër e patëm nënshkruar javën e kaluar. Dje kanë nisur punimet, ndërsa sot në orët e para të mëngjesit ia vunë flakën. Ky është krim. Përgjegjësit duhet të përballen me drejtësinë”, ka shkruar ai në një postim në Facebook.
Po ashtu, Çeku thekson se ky objekt do të restaurohet, i pëlqeu apo jo keqbërësve.
“Gjimnazi i vjetër ‘Ismail Qemali’ në Ferizaj do të restaurohet, i pëlqeu apo jo keqbërësve. Trashëgimia jonë kulturore është më e rëndësishme se interesat tuaja të ngushta. Metodat e porositë mafioze nuk na ndalojnë”, përfundoi ai.
Për këtë kanë reaguar edhe nga Komuna e Ferizajt, të cilët kanë thënë se dje kanë nisur ndërhyrjet e para për renovimin e këtij objekti. Sipas Komunës, do të mbrohet objekti me të gjithë kapacitetin e saj, pas punës restauruese. /Teve1.info/
